這才是媽媽正常的一天

間中的一啖砂糖實在敎媽媽回味，想起來媽媽記得太多你的好，原來甚少記下盧雋的十啖屎。為免你長大後誤會了自己小時候是個超乖的好孩子，也讓媽媽記下我們平常較為「正常」的一天吧。

早上

媽媽：「盧雋，起身刷牙喇！」

盧雋：「我唔要刷牙！」

媽媽：「唔刷牙D細菌會響你個口度㗎喎！」

盧雋：「我要D細菌響個口度。」

媽媽：「盧雋，自己換衫先，媽咪整早餐。」

盧雋：「我要媽咪幫我換。」

媽媽：「點解唔自己換嘅？」

盧雋：「係呀！因為我唔識換呀！」

媽媽：「你尋晚都係自己換㗎！」

盧雋：「係呀！因為，因為，因為我要媽咪幫我換呀。」

放學

媽媽：「今日響學校做咗D咩？」

盧雋：（無反應）

媽媽：「係咪好攰？今日nap time響學校有無瞓覺？」

盧雋：（無反應）

車經過油站

盧雋：「我要洗車！」

媽媽：「過咗喇喎！聽日去洗啦！」

盧雋：（尖叫）「我要依家！我要依家！」

晚上

媽媽：「盧雋，玩完要執好D玩具㗎噃。」

盧雋：「我唔想執好D玩具。」

媽媽：「點解呀？如果D玩具周圍放，會跣襯媽咪同爸爸㗎喎！」

盧雋：「我想跣襯媽咪同爸爸！」

媽媽：「盧雋，洗手食飯喇！」

盧雋：（無反應）

媽媽：「要唔要媽咪同你去洗手？」

盧雋：（無反應）

媽媽：「要唔要媽咪收咗你D玩具？」

盧雋：（尖叫）「我唔要！我唔食飯」

媽媽：「盧雋，除衫沖涼喇！」

盧雋：「我唔要沖涼！」

媽媽：「下？唔沖涼會發臭㗎喎！」

盧雋：「我想發臭！」

媽媽：「咁無小朋友會同你玩㗎喎！」

盧雋：「唔會㗎！佢哋會同我玩㗎！」